Avval xabar berganimizdek, joriy yilning 18-24-noyabr kunlari Chirchiq davlat pedagogika universiteti Yoshlar masalalari va ma’naviy-ma’rifiy ishlar bo‘yicha prorektori Samariddin Qorayev, Ta’lim sifatini nazorat qilish bo‘limi boshlig‘i Saodat Gayupova, Tarix kafedrasi dotsenti Saodat Toshtemirovadan iborat ChDPU delegatsiyasi Turkiya Respublikasida ishchi tashrif bilan bo‘lib qator uchrashuvlar, davra suhbatlari va boshqa tadbirlarda ishtirok etishdi.
Tashrifdan ko‘zlangan asosiy maqsad – Chirchiq davlat pedagogika universitetining uzoq muddatli strategiyasini, shuningdek, talabalar kompitentligi va pedagogik diplomatiya yo‘nalishida amalga oshirilayotgan faoliyat natijalari haqida turkiy tilli olimlar va professor-o‘qituvchilar jamoatchiligini xabardor qilish, o‘z navbatida, ChDPU-Turkiya hamkorligining istiqbolli yo‘nalishlari, xalqaro darajadagi pedagog kadrlar tayyorlashda hamkor oliy ta’lim muassasalari geografiyasini kengaytirishdan iborat bo‘ldi.
ChDPU delegatsiyasi o‘z uchrashuvlarini 19-noyabr kuni Ozarbayjon Til Komissiyasi qoshidagi Monitoring Markazining direktori, professor Sevinch Aliyeva, Turkiya davlati Iksat ilmiy tadqiqotlar instituti direktori, professor Mustafa Latif bilan muloqotdan boshladi.
20-noyabr kuni delegatsiya a’zolari Osmaniye hokimi Doktor Erdinch Yilmaz huzurida tashkil etilgan davra suhbatida o‘z ishlarini davom ettirishdi. Davra suhbatida O‘zbekiston—Turkiya ta’lim munosabatlari doirasida amalga oshirilgan islohotlar samarasi haqida fikr yuritildi. Chirchiq davlat pedagogika universiteti faoliyatining asosiy yo‘nalishlari, erishilgan yutuq va marralar haqida taqdimot o‘tkazildi.
20-noyabr kuni kunning ikkinchi yarimida ChDPU delegatsiyasi Chukurova Universiteti (CU) rahbariyati bilan muzokaralar o‘tkazdi. ChDPU birinchi prorektori, professor Samariddin Qorayev mezbonlarga turizm, IT va aniq fanlar sohasida mutaxassislarni tayyorlaydigan ChDPU fakultetlarining faoliyati, o‘qituvchi hamda talabalar uchun yaratilgan sharoitlar, shuningdek, universitetning o‘quv dasturi to‘g‘risida batafsil ma’lumot berdi. Tomonlar, shuningdek ayrim sohalarda tadqiqotlar o‘tkazish va tajriba almashish bo‘yicha ham hamkorlik masalasini ko‘rib chiqishdi.
21-noyabr kuni ChDPU delegatsiyasi a’zolari Osmaniye Qo‘rqut Ata universiteti rektori, professor Dr.Turgay Uzun va Turkiya bilim va texnologiyalar universiteti rektori, professor Dr.Adnan So‘zen bilan ham alohida muzokaralar o‘tkazishdi. Muloqotlar davomida har ikki universitet rahbariyati bilan hamkorlik protokollari tuzildi.
22-noyabr kuni delegatsiya a’zolari 3-Xalqaro Qo‘rqut Ata ilmiy tadqiqot kongressida ishtirok etdi. Ikki kun davom etgan kongress ilm-fan va madaniyat olamining muhim nomlarini birlashtirdi. Kongressning ochilishida Saodat Gayupova nutq so‘zladi.
O‘zbekiston delegatsiyasi a’zolari 23-noyabr kuni İKSAD instituti boshqaruv kengashi a’zosi Merve Kıdıryuz bilan uchrashdilar. Muloqot davomida xalqaro hamkorlik va akademik aloqalarni o‘rnatish bo‘yicha amalga oshirilishi mumkin bo‘lgan qo‘shma ishlar muhokama qilindi.
Xulosa o‘rnida aytganda, ChDPU delegatsiyasining Turkiya Respublikasiga tashrifi ChDPU va Turkiya universitetlari o‘rtasidagi ta’lim muloqotini yana-da chuqurlashtirish, akademik hamkorlikni kengaytirish, yangi intelektual investitsiyalar jalb etishni faollashtirish, umuman, har tomonlama aloqalarni yana-da mustahkamlashga xizmat qiladi.
