Chop etdi: OTM axborot xizmati | Ko'rildi: 93 marta
Tegishli bo'limi: Yangiliklar
Bugun universitet rektori huzurida kafedra mudirlari ishtirokida universitetning ustuvor vazifalariga bag‘ishlangan yig‘ilish bo‘lib o‘tdi.
Universitet rektori G‘ofurjon Muxamedov yig‘ilishni ochib, universitetda faoliyat yuritayotgan har bir rahbar, har bir o‘qituvchi oldida avvalo, talabalarga sifatli ta’lim olishlari va yetuk mutaxassis bo‘lib yetishishlari uchun munosib sharoit yaratib berish vazifasi turganini alohida ta’kidladi.
Ta’lim sohasini tubdan yangilash, xalqaro standartlarda integratsiyalash, shuningdek, xalqaro mehnat bozori talablariga javob beradigan yuksak salohiyatga ega mutaxassis kadrlarni tayyorlash yuzasidan qabul qilingan strategik maqsadlarga alohida e’tibor qaratish lozimligini uqtirdi.
Ta’lim sifatini nazorat qilish bo‘limi boshlig‘i Baxodir Eshchanov kafedra mudirlariga barcha kuch va resurslarni asosan to‘rtta dolzarb vazifaga qaratish yuzasidan ko‘rsatmalar berdi.
Birinchidan, Chirchiq davlat pedagogika universiteti faoliyatini xalqaro standartlar asosida tashkil etish yuzasidan tuzilgan «Yo‘l xaritasi»ni qayta ko‘rib chiqish hamda kafedra maqsad va vazifalari bilan uyg‘unlashtirish masalasiga urg‘u berdi.
Ikkinchidan, universitetda «Pedagogik ta’lim innovatsion klasteri» strategiyasini amalga oshirishda kafedralarning missiyasi va maqsadlarini belgilash borasida muayyan ishlar rejalashtirildi. Kafedralar faoliyatida milliy ta’lim tizimidagi ustuvor yo‘nalishlar va xalqaro andozalar inobatga olinishi zaruriyati tushuntirildi.
Uchinchidan, kafedralarda ta’lim sohalari uchun maqbul muhit va infratuzilmalarni yaratish maqsadida individual ta’lim va innovatsion g‘oyalarni rivojlantirish masalasini e’tiborga olib, ilmiy-tadqiqot ishlarining samaradorligini oshirish kerakligi ta’kidlandi.
To‘rtinchidan, kafedralarda o‘quv, ilmiy, ma’naviy-ma’rifiy sohalarda olib borilayotgan ishlar natijalarini ijtimoiy tarmoqlarda targ‘ib qilish yuzasidan yangi vazifalar belgilab olindi.
Universitet o‘quv ishlari bo‘yicha prorektori Doniyor Axmadjanov kafedralar faoliyati universitetning barcha sohalarini rivojlantirishda hal qiluvchi kuch va ertangi kunini belgilab beradigan asosiy omil hisoblanishini qayd etdi. Kafedralar o‘z faoliyatidagi o‘zgarishlarda universitetning taraqqiyotiga xizmat qilishi nuqtai nazardan yondashish kerakligini so‘radi.