Chirchiq davlat pedagogika universitetida an’anaviy «KAMALAK-ART» bolalar ijodiyoti festivali bo‘lib o‘tdi.
Bu yilgi an’anaviy festivalda Toshkent viloyatining 50 dan ortiq umumta’lim maktablaridan 189 nafar o‘quvchi ishtirok etdi.
Festivalning maqsadi – “Uchinchi Renessans maktab ostonasidan boshlanadi” degan g‘oyani umumta’lim maktablari, musiqa va san’at maktabi o‘quvchi-yoshlari ijodi orqali amaliyotga joriy etish, ijodiy ishlarini jamoatchilik orasida keng targ‘ib qilish, isteʼdodlilarini aniqlash, saralash, rag‘batlantirish, ularning fan, taʼlim, tarbiya va bunyodkorlik sohasidagi tashabbus va g‘oyalarini qo‘llab-quvvatlash hamda ta’til davrida bolalarni Chirchiq davlat pedagogika universitetining san'at to‘garaklariga jalb qilish orqali bo‘sh vaqtlarini mazmunli tashkil etishga qaratildi.
Festival doirasida o‘tkazilgan tanlovlar 5 sinfgacha, 5-7 sinf va 8-11 sinf o‘quvchi yoshlar toifasida tashkil etildi.
Festivaldagi nominatsiyalar:
🔹Eng yaxshi rangtasvir asari.
🔹Eng yaxshi haykaltaroshlik asari.
🔹Eng yaxshi amaliy sanʼat asari.
🔹Eng yaxshi grafika sanʼat asari.
🔹Chizmachilikda loyihalashtirish.
Nominatsiyalar bo‘yicha festival g‘oliblari I, II, III darajali Diplom va esdalik sovg‘alar bilan taqdirlandi. Festivalda g‘olib bo‘lmagan ishtirokchilarga universitetda maktab o‘quvchilari uchun tashkil etilgan to‘garaklarda qatnashish imkonini beruvchi sertifikatlar topshirildi.
G‘olib o‘quvchilarga professional tasviriy va amaliy san’atbilan shug‘ullanishlari uchun mehnat qurollari bilan bir qatorda Chirchiq davlat pedagogika universiteti talabalari tomonidan yaratilgan ijodiy mahsulotlar qimmatbaho sovg‘a sifatida topshirildi.
