Chirchiq davlat pedagogika universitetida talaba-yoshlar uchun “Karyera kuni” axborot-tanishtiruv tadbiri oʻtkazildi.

     Toshkent viloyati Maktabgacha va Maktab ta’limi boshqarmasi hamda boshqa tashkilotlar bilan hamkorlikda tashkil etilgan mazkur tadbirda mulkchilikning turli shaklidagi 1233 ta tashkilot va muassasa tomonidan 1320 ga yaqin ish oʻrinlari taklif etildi.

     “Karyera kuni”da ish beruvchi muassasa, tashkilot hamda korxonalarga universitet tomonidan talabalar toʻgʻrisida maʼlumotlar taqdim etildi. Jumladan, joriy oʻquv yilida Toshkent viloyati hududlaridan kelib universitetni tamomlayotgan 2395 nafar (bakalavriat kunduzgi bosqichida 1072 nafar, magistratura bosqichida 189 nafar, ikkinchi oliy taʼlimda 85 nafar va sirtqi taʼlim shaklida 1049 nafar) bitiruvchilar haqidagi maʼlumotlar ish beruvchilar eʼtiboriga havola qilindi.

     “Karyera kuni” axborot-tanishitiruv tadbiri yakunlari boʻyicha ish beruvchilar tomonidan 1261 dan ortiq talabalar bilan suhbatlar oʻtkazilib, ularning 121 nafariga ishga joylashish boʻyicha, 600 ga yaqin talabalarga esa amaliyot oʻtash uchun yoʻllanmalar berildi.

     Shuningdek, tadbir davomida innovatsion hamkorlik doirasida muammoli mavzular boʻyicha tadqiqotlar olib borish, oʻquv rejalariga amaliyotchi mutahassislar takliflarini eʼtiborga olgan holda oʻzgartirishlar kiritish, talabalarning malakaviy amaliyoti va tajriba oshirishini tizimli ravishda tashkil etish masalalari koʻrib chiqildi.

     Jumladan, amaliyotchi mutaxassislarni dars mashgʻulotlariga jalb qilish, bitiruv malakaviy ishlari va magistrlik dissertatsiyalarini korxona va tashkilotlar taklifini hisobga olgan holda tayyorlash jarayonlari muhokama qilindi.

     “Karyera kuni” doirasida ish beruvchi muassasa, tashkilot hamda korxonalarga universitet imkoniyatlari va salohiyati tanishtirib o‘tildi.