2025-yil 24-iyun kuni Chirchiq davlat pedagogika universiteti (CHDPU) Fizika kafedrasi,Ilmiy va metodologik kimyo kafedrasi, Algebra va matematik analiz kafedrasi, Informatika o‘qitish metodikasi kafedralari “Kelajak o‘qituvchisi” konsepsiyasi asosida ishlab chiqilgan strategik loyihalarining taqdimotini o‘tkazdi.

     Kafedra rahbarlari tomonidan taqdim etilgan har bir loyiha dolzarbligi, innovatsion yondashuvi, amaliy samaradorligi va ilmiy asoslanganligi bilan ajralib turdi. Loyihalar doirasida metodik ta’minotni takomillashtirish, maktab laborotoriyalarini tashkil etish, raqamli va axborot texnologiyalaridan foydalanish malakasini oshirish, malakaviy amaliyotni tashkil etish samaradorligi kabi masalalar ham tahlil qilindi. Ta’lim dasturlari xalqaro dasturlarga mos ravishda takomillashtirishda e’tibor qaratiladigan jihatlar muhokama qilindi.

     Shuningdek, ta’lim ehtiyoji va sigmentining tez o‘zgarishini inobatga olgan holda bitiruvchilarining kasbiy va moslashuvchan malakalarini shakllantirishda tadqiqotchilik qobiliyatini rivojlantirish mexanizmlari, kafedralar qoshida kichik ishlab chiqarishni tashkil etish kabi  yo‘nalishlarga ham e’tibor qaratildi.

     Tadbirda universitet professor-o‘qituvchilari, doktorantlar ham faol ishtirok etdi. Qizg‘in munozaralar, savol-javoblar asosida strategik loyihalar yuzasidan taklif va mulohazalar bildirildi.

     Universitetimiz rahbari G‘ofurjon Muxamedov har bir taqdimot yuzasidan fikr va tavsiyalarini berdi. Prezident ishtirokida yaqinda bo‘lib o‘tgan yig‘ilishda aniq va tabiiy fanlar bo‘yicha o‘qituvchilarni tayyorlash esa past darajada qolayotganligi ta’kidlanganligini e’tirof etdi.  

     Chirchiq davlat pedagogika universiteti PISA, PIRLS, TIMSS, TALIS tadqiqotlarida O‘zbekistonning munosib ishtirokini ta’minlashda bilvosita mas’ul ekanligini ta’kidladi.