"Kelajak o‘qituvchisi" konsepsiyasi doirasida CHDPUda strategik loyihalar taqdimoti bo‘lib o‘tdi
2025-yil 13-iyun kuni Chirchiq davlat pedagogika universiteti (CHDPU) Pedagogika fakulteti tomonidan “Kelajak o‘qituvchisi” konsepsiyasi asosida ishlab chiqilgan istiqbolli strategik loyihalar taqdimoti bo‘lib o‘tdi. Ushbu nufuzli ilmiy-amaliy tadbir zamonaviy pedagogika sohasida chuqur o‘zgarishlar davrida ta’lim sifatini yangi bosqichga olib chiqish yo‘lidagi muhim qadam sifatida e’tirof etildi.
Tadbirni universitet rektori, kimyo fanlari doktori, professor Muxamedov Gafurdjan Israilovich ochib berdi. U o‘z nutqida Yangi O‘zbekiston taraqqiyot strategiyasida “Kelajak o‘qituvchisi” konsepsiyasiga berilayotgan e’tibor, ta’lim tizimida olib borilayotgan chuqur islohotlar, raqamli transformatsiya va inson kapitalini rivojlantirishdagi muhim vazifalar haqida atroflicha to‘xtaldi. Rektor, shuningdek, pedagogik ta’limni zamonaviy ilmiy yondashuvlar, innovatsion metodlar va xalqaro standartlar asosida rivojlantirish zaruratiga urg‘u berdi.
Pedagogika fakulteti dekani, pedagogika fanlari doktori, professor Usarov Jabbor Eshbekovich fakultet tomonidan 2025–2026-o‘quv yilida amalga oshirilishi rejalashtirilgan strategik rejalar, ularning amalga oshirish mexanizmlari, monitoring tizimi va natijadorlik ko‘rsatkichlari haqida batafsil ma’lumot berdi. U ta’lim jarayonini insonparvarlik, kompetensiyaviy yondashuv va inkluzivlik tamoyillari asosida tashkil etish bo‘yicha fakultet oldiga qo‘yilgan vazifalarni bayon etdi.
Tadbir davomida Pedagogika fakultetining asosiy tarkibiy tuzilmalari – “Pedagogika”, “Psixologiya”, “Maxsus pedagogika” va “Umumiy pedagogika” kafedralari o‘zlarining istiqbolli strategic (EDUVATOR, DIGITALKOUCH, AUTOMENTOR, FLEKSPERT, ECOPEDAGOG) loyihalarini namoyish etishdi. Ushbu loyihalarda zamonaviy ta’lim texnologiyalari, raqamli platformalardan foydalanish, o‘qituvchilarning kasbiy kompetensiyasini oshirish, shuningdek, ta’limda inkluziv yondashuvni kuchaytirish yo‘nalishlariga alohida e’tibor qaratilgan.
Kafedra rahbarlari tomonidan taqdim etilgan har bir loyiha dolzarbligi, innovatsion yondashuvi, amaliy samaradorligi va ilmiy asoslanganligi bilan ajralib turdi. Loyihalar doirasida xorijiy hamkor universitetlar bilan o‘zaro tajriba almashish, xalqaro grantlarda ishtirok etish, akademik mobillikni rivojlantirish kabi yo‘nalishlar ham belgilab berildi.
Tadbirda universitet professor-o‘qituvchilari, doktorantlar ham faol ishtirok etdi. Qizg‘in munozaralar, savol-javoblar asosida strategik loyihalar yuzasidan taklif va mulohazalar bildirildi.
Mazkur taqdimot nafaqat CHDPU, balki butun respublikamiz ta’lim tizimi oldida turgan eng muhim vazifalardan biri – kelajak avlodni tarbiyalaydigan pedagog kadrlarni raqobatbardosh, ijodkor va xalqaro talablarga mos shakllantirish yo‘lida muhim strategik asos bo‘lib xizmat qiladi.
Pedagogika fakultetining ushbu tashabbusi – zamon ruhini his eta oladigan, o‘zgaruvchan sharoitga tez moslasha oladigan, pedagogik innovatsiyalarni amaliyotga tatbiq etishga qodir kelajak o‘qituvchisini tayyorlash yo‘lidagi dadil qadamdir.
