O‘zbekiston Respublikasi Prezidentining 2020 yil 12 avgustdagi "Kimyo va biologiya yo‘nalishlarida uzluksiz ta’lim sifatini va ilm-fan natijadorligini oshirish chora-tadbirlari to‘g‘risida"gi PQ-4805-son qarorida 2021/2022-yildan boshlab kimyo va biologiya yo‘nalishlarida kadrlar tayyorlayotgan barcha oliy ta’lim muassasalari umumta’lim maktablari bitiruvchi sinflar o‘quvchilari o‘rtasida ko‘p bosqichli (tuman, shahar-viloyat-oliy ta’lim muassasasi) kimyo va biologiya fani bo‘yicha olimpiada o‘tkazish va 1-, 2-, 3-o‘rinlarni egallagan o‘quvchilarni oliy ta’lim muassasasining mablag‘lari hisobidan imtihonsiz o‘qishga qabul qilish belgilangan.

Shu munosabat bilan, Toshkent viloyati Chirchiq davlat pedagogika instituti professor-o’qituvchilari tomonidan kimyo va biologiya olimpiadasining tuman (shahar) bosqichi 2022 yil 13 aprelidan 17 apreliga qadar viloyat tuman (shahar)lari Xalq ta’limi bo‘limlari bilan birgalikda umumiy o‘rta ta’lim maktabi bitiruvchilari orasida o’tkazilmoqda.

Jumladan, Angren shahar 22-umumiy o‘rta ta’lim maktabida fan olimpiadasi o‘tkazildi. Olimpiadada shaharning barcha umumta’lim maktablaridan maktab bosqichida g‘olib bo‘lgan kimyo fanidan 38 nafar hamda biologiya fanidan 38 nafar, jami 72 nafar o‘quvchilar ishtirok etdi.

Olimpiadaning tuman (shahar) bosqichi Toshkent viloyati boʻylab davom etmoqda.