Hayotda qanchalik qulayliklar koʻpaymasin, elektron vositalar bizni qanchalik qurshab olmasin, ijodkor soʻzining, qalamining mavqei aslo pasaygani yoʻq. Oʻzi jisman zaif boʻlsa-da, fikri-shuuri osmondagi yulduzlarga yetadigan Inson qalam bilan yanada sharaflandi, obroʻ-eʼtibor, eʼzoz topdi. Shoir aslida kim? U oʻz xalqining maʼnaviy-maʼrifiy ganjinalarini asrab-avaylab, yanada boyituvchi xazinabon, oʻz davrining nafasini, shukuhini keyingi davrlarga eltuvchi tarixchi va charogʻbon, nihoyat, kelajakka tomon qadam tashlayotgan Vatanining oldingi saflarida ketayotgan ruhbondir.
Kuni kecha Chirchiq davlat pedagogika universitetining muhtasham anjumanlar zalida ana shunday qalbi yoniq ijodkor, Gumanitar fanlar fakulteti Oʻzbek adabiyotshunosligi kafedrasi dotsenti, f.f.n., hassos shoira Gulandom Togʻayevaning koʻngil xazinalarini izhori boʻlgan maʼnaviy-maʼrifiy tadbir boʻlib oʻtdi. “Ishq elining ovoziman” nomli tadbir shoiraning yaqinda chop etilgan “Ishq handasasi” nomli kitobiga bagʻishlandi.
Ushbu tadbirda Oʻzbekiston Yozuvchilar uyushmasi raisi oʻrinbosari ,shoir va publitsist Gʻayrat Majid, Oʻzbekiston xalq shoiri Mahmud Toir, Oʻzbekistonda xizmat koʻrsatgan jurnalist Salim Ashur, “Shuhrat” medali sohibasi,shoira Zilola Xoʻjaniyozova, “Doʻstlik” ordeni sohibi ,shoir Shodmonqul Salom, universitet professor-oʻqituvchilari,talabalar va boshqa mehmonlar ishtirok etdilar. Tadbirda soʻzga chiqqanlar shoiraning Vatan, tinchlik, yuksak insoniy xislatlar va muhabbat vasfi kuylangan sheʼrlari haqida iliq fikrlar bildirishdi, talabalar tomonidan ijodkorning sheʼrlari ijro qilindi. Tadbir mehmonlari
Gulandom Togʻayeva va mehmonlarga universitet rektori, Oʻzbekiston fan arbobi, professor G.I.Muxamedov tomonidan esdalik sovgʻalari topshirildi. Shuningdek rektorimizga Gumanitar fanlar fakulteti dekani, y.f.n., dots. R.A.Ikramov boshchiligida fakultet jamoasi tomonidan sheʻriy esdalik sovgʻa taqdim etildi.
Koʻtarinki kayfiyatda o`tgan anjuman goʻzal sheʻriy va musiqiy chiqishlarga boy bo`lib barchada katta taassurot qoldirdi.
