2025-yil 18-aprel kuni Chirchiq davlat pedagogika universiteti tomonidan “Science and Innovation” xalqaro ilmiy jurnali bilan hamkorlikda “Matematika va axborot texnologiyalari fanlari integratsiyasida yangi metodlar va innovatsiyalar” mavzusida xalqaro ilmiy-amaliy anjuman tashkil etildi. Tadbirni Chirchiq davlat pedagogika universiteti ilmiy ishlar va innovatsiyalar bo‘yicha prorektori Baxodir Eshchanov ochib berdi. O‘zining tabrik so‘zida u matematika va axborot texnologiyalari fanlarining o‘zaro integratsiyasi zamonaviy ta’limni rivojlantirishdagi muhim omillardan biri ekanini ta’kidladi. Shuningdek, u ilmiy-tadqiqot natijalarining amaliyotga tatbiq etilishi va xalqaro hamkorlikni kengaytirish muhimligini alohida qayd etdi. Anjumanning asosiy maqsadi — matematika va axborot texnologiyalarining o‘zaro integratsiyasiga asoslangan innovatsion metodlarni o‘rganish, zamonaviy ta’lim va ilm-fan taraqqiyotidagi ilg‘or yondashuvlarni muhokama qilish hamda ilmiy-tadqiqot natijalarini amaliyotga tatbiq etishdan iborat bo‘ldi.
Ilmiy yo‘nalishlar quyidagilarni qamrab oldi:
1. Ta’limda matematika va axborot texnologiyalari integratsiyasi: nazariya va amaliyot;
2. Matematika va sun’iy intellekt: muammolar va yechimlar;
3. Matematika va informatika o‘qituvchisini innovatsion kasbiy-pedagogik faoliyatga tayyorlash usullari va tamoyillari;
4. Aniq va tabiiy fanlarni o‘qitishda matematika va axborot texnologiyalarining o‘rni.
Mazkur anjumanda O‘zbekiston, MDH mamlakatlari hamda boshqa xorijiy davlatlardan jami 250 dan ortiq ilmiy maqolalar taqdim etildi. Shulardan 150 tasi ilmiy kengash tomonidan tanlab olinib, anjuman doirasida ilmiy sessiyalardamuhokama qilindi. Anjumanda 15 nafarga yaqin xorijiy olimlar, shuningdek, 300 dan ortiq mahalliy professor-o‘qituvchilar, doktorantlar, mustaqil tadqiqotchilar va talabalarning faol ishtiroki kuzatildi. Anjumanda taqdim etilgan maqolalar Polshaning Index Copernicus, Yevropaning Zenodo va OpenAIRE kabi nufuzli xalqaro ilmiy bazalarda, shuningdek, ilmiyanjumanlar.uz platformasida chop etilishi rejalashtirilgan bo‘lib, ularning barchasi Google Scholar tizimida indekslanadi.
Xulosa o‘rnida, ushbu xalqaro anjuman matematika va axborot texnologiyalari fanlarining uyg‘unlashuvi orqali zamonaviy ta’lim va ilm-fan yo‘nalishida yangicha yondashuvlar shakllanishiga zamin yaratdi. Anjuman natijalari nafaqat ilmiy hamjamiyat, balki amaliyotchi mutaxassislar va ta’lim tizimi vakillari uchun ham muhim ahamiyat kasb etadi. Bu esa mamlakatimizda raqamli transformatsiya, sun’iy intellekt va STEM yo‘nalishlarini rivojlantirishdagi istiqbolli qadamlarning muhim dalilidir.
