Chirchiq davlat pedagogika universiteti Nemis tili kafedrasi xalqaro hamkorlik orqali talabalarning bilim va ko‘nikmalarini rivojlantirishga keng imkoniyatlar yaratmoqda. 2019 yilda universitetimiz va DAAD (Deutscher Akademischer Austauschdienst) tashkiloti o‘rtasida mustahkam aloqalar o‘rnatilib, bu talabalarga Germaniyada o‘qish va tilni chuqur o‘rganish uchun katta imkoniyatlar eshigini ochdi.

Har yili kafedra tashabbusi bilan OnSET til imtihonlari tashkil etiladi, bu esa talabalarimizni DAADning Yozgi til kurslari (HSK) kabi xalqaro dasturlarida ishtirok etishga tayyorlaydi. Bugungi kunga qadar 3 nafar talaba ushbu stipendiya sohibi bo‘lib, Germaniyada til va madaniyatni o‘rganish tajribasiga ega bo‘ldi. Bu natijalar kafedraning professional yondashuvi va kompetent kadrlarni tayyorlashdagi yutuqlaridan dalolat beradi.

2024-yil 19-noyabr kuni Nemis tili kafedrasida Germaniyaning DAAD (Germaniya akademik almashinuv xizmati) vakillari tomonidan OnSET imtihoni muvaffaqiyatli tashkil etildi.

Ushbu imtihonda 30 dan ortiq talabalar nemis tili bilimlarini sinab ko‘rish va o‘z darajalarini xalqaro miqyosda baholash imkoniyatiga ega bo‘lishdi. Imtihon natijasida talabalar xalqaro tan olinadigan sertifikatlarni qo‘lga kiritishdi, bu esa ularning kelgusidagi akademik va professional maqsadlari uchun muhim qadam hisoblanadi.

Imtihonda B1 va undan yuqori darajaga ega bo‘lgan talabalar DAADning Yozgi til kurslari kabi xalqaro dasturlar uchun tanlovning keyingi bosqichlarida ishtirok etish imkoniyatini qo‘lga kiritdilar. Bu tadbir nemis tili kafedrasining xalqaro hamkorlikni rivojlantirish va talabalarning bilim darajasini oshirishga qaratilgan faoliyatining yana bir muhim natijasi bo‘ldi.