Chirchiq davlat pedagogika universitetida viloyat prokuraturasi va boshqa mutasaddi idoralar tomonidan tasdiqlangan qo‘shma qarorning 3-ilovasidagi “Manzilli ishlash dasturi” ijrosini ta'minlash maqsadida plastik karta orqali sodir etilayotgan firibgarlik va boshqa usuldagi firibgarlik jinoyatlarini oldini olish hamda talabalarni hushyorligini oshirish yuzasidan seminar o‘tkazildi.

     Mazkur seminar plastik karta orqali amalga oshirilayotgan firibgarlik, shuningdek, zamonaviy texnologiyalar vositasida sodir etilayotgan turli ko‘rinishdagi firibgarlik jinoyatlarining oldini olish, ularning oqibatlari haqida ogohlikni oshirish va yoshlar orasida huquqiy savodxonlikni yuksaltirishga qaratildi.

     Tadbirda viloyat prokuraturasi vakillari, huquqni muhofaza qiluvchi idoralar xodimlari hamda universitet rahbariyati ishtirok etishdi. Mutaxassislar tomonidan talabalar uchun sodda va tushunarli tilda tushuntirishlar berilib, real hayotdagi holatlar misolida jinoyatlarga aralashib qolmaslik uchun ehtiyot choralari va qonuniy yo‘llar tushuntirildi.

     Shuningdek, seminar davomida talabalar o‘zlarini qiziqtirgan savollar bilan mutaxassislarga murojaat qilishdi va atroflicha javob olishdi. Ushbu ochiq muloqot shaklida o‘tgan seminar talabalar ongida firibgarlik jinoyatlarining jiddiyligi va ularning ijtimoiy hayotga salbiy ta’siri haqida chuqur tushuncha hosil qilishga xizmat qildi.

     Tadbir yakunida barcha ishtirokchilarga eslatma tarzida profilaktik axborot materiallari tarqatildi. Seminar yosh avlodning huquqiy bilimini oshirish va jinoyatchilikka qarshi kurashda ularning faolligini ta’minlash yo‘lida muhim qadam bo‘ldi.