Chop etdi: OTM axborot xizmati | Ko'rildi: 195 marta
Tegishli bo'limi: Dolzarb yangiliklar
![](https://cspu.uz/storage/app/uploads/public/92f/96e/6cd/thumb__1200_740_0_0_crop.jpg)
San’atshunoslik fakulteti tashabbusi bilan Chirchiq davlat pedagogika universitetiga O‘zbekiston xalq rassomi, Alisher Navoiy nomidagi davlat mukofoti sohibi Bahodir Jalolov tashrif buyurdi. Tashrif davomida ulkan tajriba va mahorat sohibi bo‘lgan ijodkor Jalolov bilan ijodiy uchrashuv hamda mahorat darslari tashkil etildi.
Dastlab akademik Bahodir Jalolov Chirchiq davlat pedagogika universiteti tasviriy san’at ta’limi va ijodkor talabalar uchun yaratilgan shart-sharoitlar hamda San’atshunoslik fakulteti qoshidagi studiya va markazlar faoliyati bilan tanishdi. Talabalarning amaliy san’at, badiiy kulolchilik, miniatyura, rangtasvir, haykaltaroshlik yo‘nalishlardagi ijod mahsuli, bitiruvchilarning bitiruv malakaviy va innovatsion ishlanmalari yuzasidan o‘z fikr-mulohazalarini bildirdi.
“Yoshlarning xalqaro va respublika miqyosidagi yutuqlari, ilmiy-tadqiqot ishlarining amaliyotga tatbiq etish jarayoni, yaratilgan ijodiy muhit, universitet imkoniyatlari hamda qisqa vaqt davomida erishilgan natijalari menda katta taassurot qoldirdi”, — dedi Xalq rassomi Bahodir Jalolov.
San’atshunoslik fakultetining universitet fakultetlari bilan ilmiy tadqiqot va ijodiy yo‘nalishda yo‘lga qo‘yilgan integratsiya jarayonlariga ham mehmon yuqori baho berdi.
Tashrifning ikkinchi qismida Bahodir Jalolov talaba-yoshlar uchrashuvi bo‘lib o‘tdi. Uchrashuvda talaba-yoshlar o‘zbek tasviriy san’atining shakllanishi, unda Bahodir Jalolov ijodining ahamiyati, bugugi o‘zbek va jahon mahobatli rangtasvir yo‘nalishida bo‘layotgan o‘zgarishlar haqida ko‘plab qiziqarli va muhim ma’lumotlarga ega bo‘lishdi.
Uchrashuv samimiy va do‘stona ruhda o‘tib, unda talaba-yoshlar o‘zlarining barcha savollariga ustozdan batafsil javob oldilar.