Joriy yilning 1-noyabr kuni Chirchiq davlat pedagogika universitetida bo‘lib o‘tgan “Milliy qadriyatlar - millat g‘ururi” festivalida O‘zbekiston milliy urf-odatlari va an’analari, amaliy san’at namunalari hamda milliy taomlar namoyish etildi.  

     Universitet Yoshlar bilan ishlash, ma’naviyat va ma’rifat bo‘limi hamda Xotin-qizlar kengashi  hamkorligida tashkil etilgan mazkur festivalda universitet jamoatchiligi, talabalar, Chirchiq shahridagi mahalla faollari, etnograf va folklorshunoslar ishtirok etishdi. 

     Festivalni tashkil etishdan asosiy maqsad jonajon yurtimiz milliy qadriyatlari, urf-odatlari va an’analarini asrab-avaylash, keng targ‘ib qilish hamda xalqimizning azaliy va boqiy merosi bilan talabalar va universitet jamoatchilikni yaqinroq tanishtirish, ularni namoyish etish asnosida talabalar o‘rtasida do‘stlik munosabatlarini yanada ravnaq ettirishga qaratilgan. Ko‘rik tanlov ko‘rinishida o‘tkazilgan festivalda amaliy san’at namunalari namoyishi, milliy rasm-rusumlar, xalq o‘yinlari va tomoshalari, talabalarning folklor chiqishlari va taomlar tanlovlari kabi qator tadbirlar o‘tkazildi.  

     – Festivalning asosiy voqealaridan biri – bu fakultetlarning viloyatlar kesimidagi chiqishlari bo‘ldi, – deydi bo‘lim boshlig‘i Nodir Norov. – Bu jarayonda  barcha fakultetlarga viloyatlar biriktirildi. Talabalar o‘z mahoratlarini xalqimizning ko‘p asrlik shonli tarixi, milliy urf-odatlarimiz va an’analarimizga bag‘ishladi.  

     Tanlov yakuniga ko‘ra Gumanitar fanlar fakultetining “Surxondaryo” jamoasi 1-o‘rinni, San’atshunoslik fakultetining “Qashqadaryo” jamoasi va Pedagogika fakultetining "Xorazm" jamoasi 2-o‘rinni, Matematika va informatika fakultetining “Samarqand” jamoasi 3-o‘rinni qo‘lga kiridi.  

     Ko‘rik-tanlovda alohida e’tirof etilgan jamoalar turli nominatsiyalar bilan taqdirlandi. 

     Xususan, Tabiiy fanlar fakultetining "Andijon" jamoasi “Eng faol jamoa", Turizm fakultetining "Buxoro" jamoasi “Eng ijodkor jamoa”, Fizika va kimyo fakultetining "Namangan" jamoasi “Eng kreativ jamoa”, Boshlang‘ich ta’lim fakultetining "Farg‘ona" jamoasi “Eng ahil jamoa”, Maktabgacha ta’lim fakultetining "Qoraqalpoq" jamoasi "Eng iste’dodli jamoasi" hamda Sport va chaqiriqqacha harbiy ta’lim fakultetining "Toshkent" jamoasi “Eng quvnoq jamoasi” nominatsiyasiga sazovor bo‘ldi.