Chirchiq davlat pedagogika universiteti rektori, professor G‘ofurjon Muxamedov Novosibirsk davlat pedagogika universiteti professori, NDPU san’at yo‘nalishi magistrlar va aspirantlar dasturi rahbari Oleg Shalyapin bilan uchrashdi.
Muloqot chog‘ida NDPU san’at pavilionlarida ChDPU talabalarining ko‘rgazmalarini tashkil qilish, ikki universitet talabalari uchun yozgi maktablar, telemuloqotlar va maqsadli treninglar o‘tkazish, shuningdek hamkorlikda tasviriy va amaliy san’at yo‘nalishida ilmiy-tadqiqot ishlarini yana kengaytirish masalalari muhokama qilindi. Hamkorlik natijalari tahlil etildi.
Amalga oshirigan ilk ilmiy qo'shma loyihalardan biri San’atshunoslik fakulteti dekani, professor Hayitboy Sultonov va NDPU olimlari tomonidan yaratilgan o‘quv qo‘llanma ChDPU rahbariga topshirildi. Kelgusida hamkorlikda o‘quv qo‘llanmalar va darsliklar yaratishga kelishib olindi. Rossiya delegatsiyasi qo‘shma ta’lim dasturlarini yo‘lga qo‘yishdan manfaatdor ekanligini bildirdi.
“Novosibirsk davlat pedagogika universiteti vakillari ChDPU va NDPU san'at ta'limi o‘qituvchi va talabalari uchun birgalikda tajriba almashish dasturlarini tashkil etishga ham tayyor, - dedi Oleg Shalyapin. – Ikki universitet mutaxassislarining muntazam o'zaro tashriflari talabalar tomonidan yaratilgan asarlarni puxta o'rganish ishlarini yo'lga qo'yish va hamkorlik aloqalarini mustahkamlash imkonini beradi”.
Chirchiq davlat pedagogika universiteti rektori G‘ofurjon Muxamedov mehmonlarga o‘z minnatdorchiligini bildirdi.
"ChDPU san'at ob'ektlarini raqamlashtirish dolzarb masalalardan biri. Bu masalada Sizlarning tajriba va fikrlaringiz men uchun ahamiyatli, - dedi G‘ofurjon Muxamedov. – Raqamlashtirish talabalarimiz asarlariga xalqaro miqyosda qiziqishning sezilarli darajada ortishiga xizmat qiladi. Universitet san'at obyektlariga virtual tur va talabalarimizning tasviriy san’at asarlari bilan onlayn-tanishuv ularning dunyo miqyosida ommalashtirishga salmoqli hissa qo'shadi".
Bundan tashqari, tomonlar ikki universitet talabalari ishtirokida dala amaliyotlarini o'tkazishga kelishib oldi. Ta’kidlash joizki, muloqotda O‘zbekiston “Hunarmand” uyushmasi a’zosi, Xalq ustasi Alisher Narziyev ham ishtirok etdi.
