Chop etdi: OTM axborot xizmati | Ko'rildi: 299 marta
Tegishli bo'limi: Konferentsiya
![](https://cspu.uz/storage/app/uploads/public/b9b/3ac/d1d/thumb__1200_740_0_0_crop.jpg)
Bugun “Zamonaviy fizika va astronomiyaning dolzarb muammolari, yechimlari va o‘qitish uslublari" mavzusida respublika konferensiyasi boʻlib oʻtdi. Konferensiya O‘zbekiston Respublikasining fizika va astronomiya o‘qitiladigan universitetlari hamda ilmiy tekshirish institutlari, jumladan, Chirchiq davlat pedagogika universiteti, Nizomiy nomidagi Toshkent davlat pedagogika universiteti, O‘zR FA Astronomiya ilmiy tekshirish institutining hamkorlikdagi tashabbusi hisoblanadi. Konferensiya Chirchiq davlat pedagogika universitetida, gibrid rejimda, tashrif buyurganlar va virtual ishtirokchilarni birlashtirgan holda tashkil etildi.
Anjumanning maqsadi O'zbekistonda tabiiy fanlarni rivojlantirish hamda ta'limni yaxshilash borasida islohotlar, tabiiy fanlar rivojida fizika va astronomiya fanlarining ahamiyatini muhokama qilish, bilim va tajriba, ilmiy tadqiqotlar va rivojlanish strategiyalarining natijalarini almashish hamda oʻzaro hamkorlik uchun yoʻl xaritalarini belgilab olishdan iborat boʻldi.
Konferensiyaning asosiy maʼruzachilari orasida taniqli olimlar, davlat va xususiy sektor, OTM va ilmiy markazlari vakillari, Chirchiq davlat pedagogika universitetining doktorant, magistr va bakalavr talabalari ishtirok etdilar.
Konferensiya ishini universitet prorektori Samariddin Qorayev tabrik so‘zi bilan ochib berdi. Shuningdek, universitet professori, fizika-matematika fanlari Ikromjon Tursunov so‘zga chiqib, konferensiya ishiga muvaffaqqiyat tiladi.
Konferensiyaning yalpi majlisi va sho'balar yig'ilishida eshitilgan ma'ruzalarda zamonaviy fizika va astronomiya sohalarini hozirgi kun nuqtai nazaridan o‘rganish, undagi mavjud muammolarni aniqlashtirish va ularga yechim topish, shuningdek respublikamizda fizika va astronomiya sohasida bajarilayotgan ishlar bo‘yicha o‘zaro fikr almashishga qaratildi.
Konferensiya 3 ta sho‘ba ish olib borib, unda jami 110 dan ortiq ma’ruzalar tinglandi. Unda doktorantlar, magistr va bakalavr talabalar hamda yosh iqtidorli talaba-yoshlar tomonidan olib borilayotgan ilmiy tadqiqot ishlari muhokama qilindi. Sho‘ba majlislarida eng yaxshi ma’ruza tanlovi o‘tkazilib, g‘oliblar aniqlandi.
Anjuman yakunida fakultet kafedralarida iqtidorli talabalar bilan seleksion ishlarni olib borish va ularni istiqbolli ilmiy mavzular bo‘yicha ilmiy-tadqiqot ishlarga jalb etish ko‘lamini yanada kengaytirish hamda yetuk xorijiy pedagogik oliygohlar va ilmiy tadqiqot institutlari bilan hamkorlikda mutaxassislik fanlarini interaktiv usullarda o‘qitilishini tashkil etish, kafedralarning ilmiy to‘garaklarida fizika va astronomiya sohalarning zamonaviy texnologiyalari bo‘yicha yangiliklarini o‘zlashtirishga kelishib olindi.