Yakuniga yetayotgan haftada barchani e’tiborini tortgan milliy kiyimlar namoyishi bo‘lib o‘tdi. Tadbir ochiq osmon ostida universitetning talabalar shaharchasida tashkil etildi. Ko‘rgazma Texnologik ta’lim kafedrasi qoshidagi “Kreativ tikuvchi” to‘garagi ko‘magida o'tkazildi. Podiumda universitetimiz dizayner talaba-qizlarining milliylik va zamonaviylik uyg‘unlashgan rang-barang liboslari taqdim etildi.

     Koʻrgazma universitetning San’atshunoslik fakulteti talabalari ijrosidagi milliy qoʻshiqlardan iborat konsert-shou sadolari ostida namoyish etildi. Koʻrgazma davomida milliy liboslar bilan birgalikda, talabalar uchun tavsiya etiladigan kiyimlar ham namoyishi boʻldi. Talaba-qizlarimizning  ham dizaynerlar, ham libos konstruktorlari, ham tikuvchilik vazifasini muvaffaqiyatli bajarganligi libos san’at ixlosmandlarini, professor-o‘qituvchilar va talabalarni  olqishiga sazovor bo‘ldi.

     Jumladan, ilk bor universitet podiumda namoyish etilgan bolalar libosi yig‘ilganlar tomonidan alohida e’tirof edi. Universitet talabasi Mahbuba Samadova "Universitetda libos san’atini ommalashtirishga va rivojlantirishga qo‘shgan ulkan hissasi uchun” maxsus diplom bilan taqdirlandi. Diplomni universitet rektori G‘ofurjon Muxamedov topshirdi. Shuningdek namoyishda ishtirok etgan barcha talabalar turli nominatsiya sohiblari bo‘ldi.

     Milliy liboslarimiz namoyishiga bagʻishlangan bunday koʻrgazmalar yoshlarning milliy qadriyatlarimizga boʻlgan hurmatini yanada oshirishda, anʼanalarimizni qadrlashda muhim ahamiyat kasb etadi. Tadbirda nafaqat professor-oʻqituvchi va talabalar, balki universitet atrofidagi mahallalardan kelgan yoshlar ham ishtirok etdi.