2025-yil 17-21 iyun kunlari Chirchiq davlat pedagogika universiteti rektori, professor G‘ofurjon Isroilovich Muxamedov boshchiligidagi delegatsiya Rossiya Federatsiyasining yirik oliy ta’lim muassasasi – Ural federal universitetiga xizmat safari uyushtirdi.
Xizmat safari doirasidagi tadbirlar Ekaterinburg shahrida muhim uchrashuvlar va hamkorlik tashabbuslari bilan boshlandi. Safarning dastlabki kunida universitet delegatsiyasini Ural federal universiteti Gumanitar fanlar instituti direktori, professor, Rossiya ta’lim akademiyasi akademigi Simanyuk Elvira Evaldiena samimiy qabul qildi. Uchrashuv chog‘ida ikki oliy ta’lim muassasasi o‘rtasidagi o‘zaro aloqalarni kengaytirish imkoniyatlari muhokama etildi.
Shundan so‘ng delegatsiya a’zolari Ural federal okrugidagi iqtidorli yoshlar uchun tashkil etilgan qo‘shimcha ta’lim markazi faoliyati bilan yaqindan tanishishdi. Mazkur markaz zamonaviy ta’lim texnologiyalari bilan jihozlangan bo‘lib, okrugdagi iqtidorli yoshlarga fanning turli yo‘nalishlari bo‘yicha onlayn va masofaviy shaklda qo‘shimcha ta’lim olish imkonini yaratib beradi. Markaz faoliyatining asosiy maqsadi – iqtidorli yoshlarni rag‘batlantirish, ularning ilmiy-ijodiy salohiyatini rivojlantirish va kelajak mutaxassislarini tayyorlashda zarur shart-sharoitlarni yaratishdan iborat.
Safarning ikkinchi kuni universitet delegatsiyasi Ural federal universitetining xalqaro aloqalar bo‘yicha prorektori Sergey Gennadevich Tushin huzurida rasmiy qabulda bo‘ldi. Uchrashuv davomida oliy ta’lim muassasalari o‘rtasidagi strategik hamkorlik masalalari muhokama qilindi. Xususan, quyidagi yo‘nalishlarda kelishuvlarga erishildi:
- qo‘shma ilmiy kengashlar faoliyatini tashkil etish orqali mutaxassislar o‘rtasida tizimli tadqiqotlar olib borish;
- 2026 yilda hamkorlikda xalqaro konferentsiya uyushtirish tashabbusi;
- qo‘shma ilmiy laboratoriya faoliyatini yo‘lga qo‘yish, xususan, pedagogika, psixologiya va innovatsion ta’lim texnologiyalari bo‘yicha;
- fundamental va amaliy loyihalarni birgalikda amalga oshirish, jumladan, xalqaro grandlar doirasida ishtirok etish masalalari muhokama qilindi.
O‘sha kuni muhim uchrashuvlardan biri sifatida delegatsiya a’zolari Ekaterinburgdagi O‘zbekiston Respublikasining Bosh konsulligida mehmon bo‘ldi. Bosh konsul Jahongir Zokirovich Parmonov bilan uchrashuv davomida Rossiyada tahsil olayotgan va mehnat faoliyatini amalga oshirayotgan yurtdoshlarimizning huquqiy, ijtimoiy va ma’naviy qo‘llab-quvvatlanishiga oid masalalar muhokama qilindi. Shuningdek, Ural federal okrugi hududidagi oliy ta’lim muassasalari bilan hamkorlikni yanada rivojlantirishda konsullik tomonidan ko‘rsatiladigan amaliy yordam, axborot almashinuvi va ko‘p tomonlama diplomatik-madaniy aloqalarni yo‘lga qo‘yish masalalari bo‘yicha o‘zaro fikr almashildi.
Tashrif davomida delegatsiya Ekaterinburg shahridagi 13-son gimnaziya faoliyati bilan ham tanishdi. Ushbu ta’lim muassasasiga tashrif chog‘ida gimnaziyaning ta’lim-tarbiya tizimi, o‘qitishning innovatsion metodlari va o‘quv muhiti ko‘zdan kechirildi. Gimnaziya rahbariyati bilan zamonaviy ta’limdagi muammolar, o‘qituvchi salohiyati, o‘quvchi shaxsiyatini shakllantirish masalalari bo‘yicha mazmunli muloqot o‘tkazildi.
Safar doirasida yana bir muhim uchrashuv – UrFU qoshidagi pedagogika yo‘nalishi bo‘yicha ixtisoslashgan ilmiy kengash raisi, professor Rezer Tatyana Mixaylovna bilan bo‘lib o‘tdi. Uchrashuvda pedagogika sohasida qo‘shma ilmiy tadqiqotlar, aspirantura va doktorantura bo‘yicha hamkorlik, metodik tadqiqot yo‘nalishlarini muvofiqlashtirish masalalarida o‘zaro maslahatlashuvlar o‘tkazildi.
Safarning yuqori notasi sifatida Chirchiq davlat pedagogika universiteti rektori G‘ofurjon Isroilovich Muxamedovga Ural federal universiteti tomonidan “Faxriy professor” unvoni tantanali ravishda topshirildi. Ushbu e’tirof O‘zbekiston va Rossiya oliy ta’lim muassasalari o‘rtasidagi do‘stona munosabatlar va uzoq muddatli hamkorlik rishtalari uchun mustahkam asos bo‘lib xizmat qiladi.
Xizmat safari natijalari Chirchiq davlat pedagogika universiteti xalqaro hamkorlik aloqalarini yanada kengaytirish, pedagogik ta’lim sifatini oshirish, ilmiy tadqiqotlar samaradorligini kuchaytirish va ma’naviy-ma’rifiy faoliyatni yangi bosqichga olib chiqishga xizmat qiladi.
