Yoshlarni vatanparvarlik va ona yurtga muhabbat, milliy qadriyat va an’analarimizga hurmat, shonli tariximizni chuqur bilish ruhida tarbiyalash maqsadida 9 may – Xotira va qadrlash kuni arafasida Chirchiq shahri faxriylari va universitet yoshlari ishtirokida  “Uch avlod uchrashuvi” o‘tkazildi.

     Uchrashuvda mamlakatimizda inson omiliga yuksak e’tibor berilayotgani, davlatimiz rahbari tashabbusi bilan jamiyatimizning har bir a’zosiga g‘amxo‘rlik, mehr-oqibat ko‘rsatilayotgani, inson qadr-qimmati, uning orzu-niyatlarini ro‘yobga chiqarishga imkoniyat yaratib berish ustuvor vazifaga aylangani alohida ta’kidlandi.

     Yoshi ulug‘ faxriylar hayoti va mehnat faoliyati davomida to‘plagan boy tajribasi, yoshlik davridagi o‘ziga xos qiyinchiliklar, mehnat pallasidagi mashaqqatlar, nihoyat nuroniylik paytida ko‘rsatilayotgan hurmat-ehtirom haqida o‘z dil so‘zlarini, samimiy fikrlarini bildirdi.

     Motivatsion ruhda o‘tgan tadbir davomida Vatanni madh etuvchi qo‘shiqlar yangradi. Mehmonlar Jismoniy madaniyat fakultetida yaratilgan zamonaviy sharoitlar bilan tanishdilar.Tadbir so‘ngida faxriylarga esdalik sovg‘alari topshirildi.