Chirchiq davlat pedagogika universitetida tabiiy fanlarning innovatsion-pedagogik metodlarni takomillashtirish va tatbiq qilish, bioxilma-xillikni asrash, o‘simliklar va hayvonot dunyosi genofondini muhofaza qilishda ilmiy aloqalarni mustahkamlash maqsadida “Zamonaviy biologiyaning dolzarb muammolari: yechimlari, istiqbollari va o‘qitishda fan-ta’lim integratsiyasi” mavzusidagi xalqaro ilmiy-amaliy konferensiya tashkil etildi.

     “Zamonaviy biologiyaning dolzarb muammolari: yechimlari, istiqbollari va o‘qitishda fan-ta’lim integratsiyasi” mavzusidagi xalqaro konferensiyadan ko‘zlangan asosiy maqsad xalqaro darajada o‘zaro tabiiy fanlar ta’limida hamkorlikni yanada mustahkamlash, fan va ishlab chiqarishning o‘zaro manfaatli hamkorlik mexanizmini yo‘lga qo‘yishda zamonaviy biotexnologiya yutuqlaridan foydalanish, yangi nav va zotlar yaratishda zamonaviy molekulyar biologiya, biokimyo yutuqlaridan foydalanish, virusologiyaning dolzarb masalalari hamda zamonaviy ta’limni tashkil etishda innovatsion yondoshuvlar sohalarida olib borilayotgan ilmiy tadqiqotlarga O‘zbekistonlik yosh olimlar, oliy ta’lim muassasalarining professor-o‘qituvchilari, iqtidorli talaba-yoshlarni faol jalb qilish, samarali ilmiy hamkorlikni yo‘lga qo‘yish hisoblanadi.  

     Xalqaro konferentsiya onlayn va oflayn shaklda tashkil etilib, konferentsiya ishida mamlakatimizdagi 10 dan ortiq oliy ta’lim muassasalari bilan birgalikda, Rossiya va Markaziy Osiyo  davlatlaridagi nufuzli yetakchi oliy ta’lim muassasalari professor-o‘qituvchilari, ilmiy-tadqiqot institutlari olimlar ishtirok etdi. 

     "Tabiiy fanlar fakultetining barcha talabalari uchun, xalqaro ekspertlar o‘z bilim va malakalarini o‘rtoqlashadi”, - dedi Biologiya kafedrasi mudiri Vohid Fayziev.

     Xalqaro konferensiya “Bioxilma-xillikni asrash, o‘simliklar va hayvonot dunyosi genofondini muhofaza qilish”, “Ekologik toza mahsulotlar yetishtirishda zamonaviy biotexnologiya yutuqlaridan foydalanish”, “Yangi nav va zotlar yaratishda zamonaviy genomika, proteomika, genetika va seleksiya, molekulyar biologiya, biokimyo yutuqlaridan foydalanish masalalari”, “Mikrobiologiya va virusologiyaning dolzarb masalalari hamda atrof-muhit muhofazasida mikroorganizmlarning roli”, “O‘qitishda fan-ta’lim integratsiyasi va pedagogik texnologiyalarni joriy etishning dolzarb muammolari” nomli 5 ta sho‘bani qamrab oldi.  

     Konferensiya doirasida  yangi yondashuvlar va dolzarb tadqiqotlar, innovatsion taraqqiyotda tabiiy fanlarning o‘rni yo‘nalishlarida yosh tadqiqotchilar, mamlakatimiz va xorijdagi taniqli olimlarning ilmiy ma’ruzalari tashkil etildi